राष्ट्रपतिलाई मनपर्यो श्रीमतीको नांगो फोटो
फ्रेन्च राष्ट्रपति निकोलस सार्कोजीकी श्रीमती कार्ला ब्रुनीले आफूले मोडलिङ गर्दाको नांगो फोटो देख्दासमेत श्रीमान् खिन्न नभएको बताएकी छिन् ।पूर्व इटालियन मोडल ब्रुनीले सार्कोजीसँग गत तीन महिनाको प्रेम-सम्बन्धपछि गत फेब्रुअरीमा विवाह गरेकी हुन् । आफ्नो नांगो फोटो सार्वजनिक हुन सक्ने सम्भावनाप्रति उनले सार्कोजीलाई सचेत गराएकी थिइन् । तर, त्यो फोटो देख्दा सार्कोजीले उल्टै भने, ‘मलाई यो फोटो मन पर्यो । यसको एउटा पि्रन्ट पाउन सक्छु ?’ भ्यानिटी फेयर म्यागेजिनलाई दिएको अन्तर्वार्तामा ब्रुनीले राष्ट्रपतिको यो भनाइ उद्धृत गरेकी छिन् ।
४० वर्षीय प्रथम महिला ब्रुनीले अन्तर्वार्तामा सार्कोजीसँग प्रेममा परेपछि मात्र मिडियाको हमलालाई आफूले पूर्ण रूपमा बुझ्न सकेको बताएकी छिन् ।
‘मेरो गल्ती यही थियो कि, म प्रेममा पागल भएँ । तर, यसको परिणाम कति व्यापक होला भन्ने बुझ्न सकिनँ,’ उनले भनिन् । उनका अनुसार सार्कोजी उनीप्रति अति आशक्त भइसकेका थिए । त्यसैले चिनजानको केही हप्तामै बिहेको प्रस्ताव राखेका थिए । सार्कोजीकी पूर्व दोस्री पत्नी सिसिलियासँग आफ्नो सम्बन्ध तनावपूर्ण रहेको तर, पहिली पत्नीसँग भने मैत्रीपूर्ण सम्बन्ध रहेको ब्रुनीले स्वीकारिन् ।
‘म सिसिलियासँग भेट्न र खाना खाने अवसर पाएमा रमाउनेछु । तर, मेरो विचारमा यसका लागि उनी र सार्कोजी दुवै तयार छैनन्,’ ब्रुनीले भनिन्, ‘उनीहरू अझै पनि प्रेम-अग्निमा जलेका छन् । उनीहरूबीच अत्यन्त गाढा प्रेम रहेको यसले प्रमाणित गरेको छ ।’
ब्रुनीले आफू गर्भवती भएको हल्ला अस्वीकार गरेकी छिन् र आफ्नो फुलेको पेटलाई बियर खाएर फुलेको बताएकी छिन् । सार्कोजीबाट सन्तान जन्माउनु आफ्नो सपना रहेको उनी बताउँछिन् । ‘सन्तान जन्मेको खण्डमा म संसारकै सबभन्दा सुखी व्यक्ति हुनेछु । नजन्मे पनि त्यो सैतानलाई म फकाउने छैन ।’ ब्रुनीको पूर्वप्रेमीका तर्फबाट एउटा छोरो छ भने राष्ट्रपति सार्कोजीका अघिल्ला दुई श्रीमतीबाट तीन सन्तान छन् । यसैगरी, सार्कोजीसँग बिहे गर्नुभन्दा अघि नै १५ व्यक्तिसँग प्रेम गरेको ब्रुनीले खुलासा गरेकी छिन् । एरिक क्लाप्टन, मिक जागर, डोनाल्ड टम्प आदिसँग उनको प्रेमसम्बन्ध गाँसिएको थियो ।
Posted by
at
07:59:30
