JANATAKO BLOG

हातमा निक्षेप पुस्तिका र कलम बोकेकी अक्कताईले यौन साझेदारको खोजीमा भौंतारिएका पुरुषहरुको नजर आफूमाथि पर्दा कुनै वास्ता गरिनन् । उनलाई त्यस्ता मानिसको वास्ता गर्ने फुर्सद नै छैन । यो प्रसङ्ग भारतको व्यापारिक राजधानी मुम्बईस्थित यौनबजारको हो । अक्कताइ यौनकर्मीबाट लिइएको पैसा बैंकमा लगेर जम्मा गर्छिन् । मुम्बइको कामतीपुरस्थित यौनबजारका दुइ सय ९४ वटा वेश्यालयमा घुमेर यौनकर्मीबाट जम्मा गरिएको पैसा बैंकमा पुर्याउनु उनको काम हो । ‘कतिपय महिला रातभरि नै व्यस्त हुन्छन् । उनीहरुले दिउँसो पैसा जम्मा गर्न नसक्ने बताएका छन् ।’ संगीनी बैकिङ सेवाकी कामदार अक्कताइले भनिन् । आर्थिक कारोबार गर्ने गैरसरकारी संघसंस्थाको ठगीमा परेका एसियाको सबभन्दा ठूलो उक्त यौनबजारका व्यवसायीले बैकिङ सुविधाको माग राख्दै आएका थिए । उनीहरुको मागलाई अमेरिकी गैरसरकारी संस्था पपुलेसन सर्भिस इन्टरनेशनल (पीएसआइ)ले गत जुलाइदेखि पूरा गरिदिएको छ ।

‘बिरामी परेपछि ग्राहक आउँदैनन् । त्यस्तो बेलामा उपचारका लागि सहयोग पुगोस् भनी दैनिकजसो १०/२० रुपैयाँ जम्मा गर्न थालेका हौं,’ यौनकर्मीको मानवअधिकारका लागि लड्दै आएकी मायाले भनिन् । उनी पनि यौनकर्मी नै हुन् । पीएसआइले संगीनी सहकारी संस्था खोली स्टेट बैंक अफ इन्डियामा खाता खोलिदिएको छ । उक्त खातामा यौनकर्मीहरु पैसा जम्मा गर्छन् । संस्थाले निक्षेपकर्ताको व्यक्तिगत विवरण र निक्षेप रकमबारे बैग्लै खाता बनाउँछ । आफ्नो परिचय खुल्ने कागजपत्र नभएका दुइ हजार पाँच सय महिलाले हाल उक्त खातामा एक लाख अमेरिकी डलर जम्मा गरिसकेका छन् । ‘कतिपय यौनकर्मीले त जीवनमै पहिलोपटक आफूसँग पैसा भएको महसुस गरेका छन् ।’, पीएसआइका आर्थिक व्यवस्थापक जीवन प्रकाशले भने । गत फेब्रुअरीदेखि संगीनीले प्रतिव्यक्ति वाषिर्क १५ हजार भारु ऋण पनि दिन थालेको छ । तीमध्येकी एक महिलाले ऋण लिएर आफ्नो यौनव्यवसाय पुनःनिर्माण गर्नुका साथै छोरालाई डीभीडी तथा मोवाइल फोनको पसल खोलिदिएको पीएसआइका कार्यक्रम व्यवस्थाक डीएन क्रसले बताएका छन् ।